Óhefluð jól

Jólatónleikar Garpa á Lyst í fyrra voru jólatónleikarnir sem fólk vissi ekki að það þyrfti. Þá héldu leikararnir og vinirnir Hjalti Rúnar Jónsson, Kristinn Óli Haraldsson og Vilhjálmur B. Bragason óhefluðustu jólatónleika í manna minnum ásamt gítargoðinu Daníel Andra Eggertssyni. Nú á að endurtaka leikinn en þar sem Kristinn Óli er innblásin af heilögum anda og fastur í barneignum í borginni þá verður sérstakur heiðursgestur á tónleikunum engin önnur en Hólmfríður Hafliðadóttir, sem ætlar m.a. að frumflytja sína fyrstu lagasmíð, svo um sögulegt kvöld er að ræða í ýmsum skilningi. Eins og í fyrra er ætlunin hjá þessu fríða föruneyti að flytja frumsamin lög eftir sig og aðra, gantast og grínast, segja sögur, sýna látbragð og spunalistir úr leikhúsinu, auk þess sem þau eru boðin og búin að framkvæma minniháttar lýtaaðgerðir á tónleikagestum, enda meðvituð um mikilvægi þess að líta vel út um jólin. Kvöldstund sem slær á kvíða og stress fyrir jólunum, falleg, frumleg og fyndin.